tujh par mirī mohabbat qurbān ho na jaa.e
ye kufr baḌhte baḌhte īmān ho na jaa.e
allāh rī be-naqābī us jān-e-mudda.ā kī
merī nigāh-e-hasrat hairān ho na jaa.e
merī taraf na dekho apnī nazar ko roko
duniyā-e-āshiqī meñ haijān ho na jaa.e
palkoñ pe ruk gayā hai aa kar jo ek aañsū
ye qatra baḌhte baḌhte tūfān ho na jaa.e
hadd-e-sitam to hai bhī hadd-e-vafā nahīñ hai
zālim tirā sitam bhī ehsān ho na jaa.e
hotī nahīñ hai vaq.at hotī nahīñ hai izzat
jab tak ki koī insāñ insān ho na jaa.e
us vaqt tak mukammal hotā nahīñ hai koī
jab tak ki ḳhud ko apnī pahchān ho na jaa.e
'bahzād' is liye maiñ kahtā nahīñ huuñ dil kī
Dartā huuñ sun ke duniyā hairān ho na jaa.e
tujh par meri mohabbat qurban ho na jae
ye kufr baDhte baDhte iman ho na jae
allah ri be-naqabi us jaan-e-muddaa ki
meri nigah-e-hasrat hairan ho na jae
meri taraf na dekho apni nazar ko roko
duniya-e-ashiqi mein haijaan ho na jae
palkon pe ruk gaya hai aa kar jo ek aansu
ye qatra baDhte baDhte tufan ho na jae
hadd-e-sitam to hai bhi hadd-e-wafa nahin hai
zalim tera sitam bhi ehsan ho na jae
hoti nahin hai waqat hoti nahin hai izzat
jab tak ki koi insan insan ho na jae
us waqt tak mukammal hota nahin hai koi
jab tak ki KHud ko apni pahchan ho na jae
'bahzad' is liye main kahta nahin hun dil ki
Darta hun sun ke duniya hairan ho na jae
Source:
Kaif-o-Suroor (Pg. B-39 E-37)
-
Author:
Behzad Lakhnavi
-
- Publisher: Saqi Book Depot, Delhi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.