tujhe ai zahid-badnam samjhana bhi aata hai

tujhe ai zāhid-badnām samjhānā bhī aatā hai

kahīñ bātoñ meñ terī rind-e-mai-ḳhāna bhī aatā hai

matānat-āfrīñ nazreñ karam-gustar saf-e-mizhgāñ

sitam Dhāne ko uTThe ho sitam Dhānā bhī aatā hai

unhīñ nāzuk laboñ ko fursat-e-ātish-bayānī bhī

unhīñ nāzuk laboñ ko phuul barsānā bhī aatā hai

kaho bāda-kasho kyā haal hai faizān-e-sāqī kā

kabhī mahfil meñ daur-e-jām-o-paimāna bhī aatā hai

nahīñ mahdūd ehsās-e-tapish sham-e-farozāñ tak

balā kā soz le kar dil meñ parvāna bhī aatā hai

fanā kā dars detī haiñ rah-e-ulfat meñ jo maujeñ

unhīñ ke pech-o-ḳham se dil ko bahlānā bhī aatā hai

unhīñ ashkoñ meñ ehsās-e-alam kā sail-e-be-pāyāñ

sar-e-mizhgāñ unhīñ ashkoñ ko tharrānā bhī aatā hai

tumhīñ ne lab ko baḳhshī hai matā-e-ḳhāmushī varna

zabāñ se qissa-hā-e-shauq dohrānā bhī aatā hai

tujhe ai zahid-badnam samjhana bhi aata hai

kahin baaton mein teri rind-e-mai-KHana bhi aata hai

matanat-afrin nazren karam-gustar saf-e-mizhgan

sitam Dhane ko uTThe ho sitam Dhana bhi aata hai

unhin nazuk labon ko fursat-e-atish-bayani bhi

unhin nazuk labon ko phul barsana bhi aata hai

kaho baada-kasho kya haal hai faizan-e-saqi ka

kabhi mahfil mein daur-e-jam-o-paimana bhi aata hai

nahin mahdud ehsas-e-tapish sham-e-farozan tak

bala ka soz le kar dil mein parwana bhi aata hai

fana ka dars deti hain rah-e-ulfat mein jo maujen

unhin ke pech-o-KHam se dil ko bahlana bhi aata hai

unhin ashkon mein ehsas-e-alam ka sail-e-be-payan

sar-e-mizhgan unhin ashkon ko tharrana bhi aata hai

tumhin ne lab ko baKHshi hai mata-e-KHamushi warna

zaban se qissa-ha-e-shauq dohrana bhi aata hai