tujhe kab pukara nahin ja raha

tujhe kab pukārā nahīñ jā rahā

firāq ab sahārā nahīñ jā rahā

ajab be-kalī hai pas-e-ishq bhī

ye lamha guzārā nahīñ jā rahā

tahayyur-zada ik jahāñ hai magar

tujhī tak ishāra nahīñ jā rahā

sar-e-shauq manzil hai vo pesh-o-pas

thakan ko utārā nahīñ jā rahā

taġhayyur kā idrāk hote hue

nayā ruup dhārā nahīñ jā rahā

nahīñ duur tak, jiit kā shā.iba

magar ham se haarā nahīñ jā rahā

tujhe kab pukara nahin ja raha

firaq ab sahaara nahin ja raha

ajab be-kali hai pas-e-ishq bhi

ye lamha guzara nahin ja raha

tahayyur-zada ek jahan hai magar

tujhi tak ishaara nahin ja raha

sar-e-shauq manzil hai wo pesh-o-pas

thakan ko utara nahin ja raha

taghayyur ka idrak hote hue

naya rup dhaara nahin ja raha

nahin dur tak, jit ka shaiba

magar hum se haara nahin ja raha