tujhe na aaengi muflis ki mushkilat samajh

tujhe na ā.eñgī muflis kī mushkilāt samajh

maiñ chhoTe logoñ ke ghar kā baḌā huuñ baat samajh

mire 'alāva haiñ chhe log munhasir mujh par

mirī har ek musībat ko zarb saat samajh

falak se kaT ke zamīñ par girī patangeñ dekh

tū hijr kāTne vāloñ kī nafsiyāt samajh

shurū' din se udheḌā gayā hai merā vujūd

jo dikh rahā hai use merī bāqiyāt samajh

kitāb-e-'ishq meñ har aah ek aayat hai

aur āñsuoñ ko hurūf-e-muqatti’āt samajh

kareñ ye kaam to kumbe kā vaqt kaTtā hai

hamāre hāthoñ ko ghar kī ghaḌī ke haath samajh

dil-o-dimāġh zarūrī haiñ zindagī ke liye

ye hāth-pāñv izāfī sahūliyāt samajh

tujhe na aaengi muflis ki mushkilat samajh

main chhoTe logon ke ghar ka baDa hun baat samajh

mere 'alawa hain chhe log munhasir mujh par

meri har ek musibat ko zarb sat samajh

falak se kaT ke zamin par giri patangen dekh

tu hijr kaTne walon ki nafsiyat samajh

shuru' din se udheDa gaya hai mera wujud

jo dikh raha hai use meri baqiyat samajh

kitab-e-'ishq mein har aah ek aayat hai

aur aansuon ko huruf-e-muqatti’at samajh

karen ye kaam to kumbe ka waqt kaTta hai

hamare hathon ko ghar ki ghaDi ke hath samajh

dil-o-dimagh zaruri hain zindagi ke liye

ye hath-panw izafi sahuliyat samajh