tum agar sikhna chaho mujhe batla dena

tum agar sīkhnā chāho mujhe batlā denā

'aam sā fan to koī hai nahīñ tohfa denā

ek hī shaḳhs hai jis ko ye hunar aatā hai

ruuTh jaane pe fazā aur bhī mahkā denā

bhāñp lenā ki bahut vaqt nahīñ us ke paas

aur phir us ko kisī bahs meñ uljhā denā

husn duniyā meñ isī kaam ko bhejā gayā hai

ki jahāñ aag lagī ho use bhaḌkā denā

un buzurgoñ kā yahī kaam huā kartā thā

jahāñ ḳhūbī nazar aa.ī use chamkā denā

dil batātā hai mujhe 'aql kī bāteñ kyā kyā

banda pūchhe ki tirā hai koī lenā denā

aur kuchh yaad na rahtā thā laḌā.ī meñ use

haañ magar mere guzishta kā havāla denā

us kī fitrat meñ na thā tark-e-ta'alluq lekin

dūsre shaḳhs ko is nahj pe pahuñchā denā

jāntā thā ki bahut ḳhaak uḌā.egā mirī

koī āsān nahīñ thā use rasta denā

ye vo mansab haiñ jo apnoñ ko diye jaate haiñ

yaad kyā rakhnā ise aur bhulā kyā denā

kyā pata ḳhud se chhiḌī jang kahāñ le jaa.e

jab bhī yaad aa.uuñ mirī jaan kā sadqa denā

dil kā sāmān koī ḳhaak ḳharīde us se

yaad hī jis ko na rahtā ho baqāyā denā

baat karne se gurezāñ nazar aate haiñ magar

ḳhatm hai hazrat-e-'javvād' pe luqma denā

tum agar sikhna chaho mujhe batla dena

'am sa fan to koi hai nahin tohfa dena

ek hi shaKHs hai jis ko ye hunar aata hai

ruTh jaane pe faza aur bhi mahka dena

bhanp lena ki bahut waqt nahin us ke pas

aur phir us ko kisi bahs mein uljha dena

husn duniya mein isi kaam ko bheja gaya hai

ki jahan aag lagi ho use bhaDka dena

un buzurgon ka yahi kaam hua karta tha

jahan KHubi nazar aai use chamka dena

dil batata hai mujhe 'aql ki baaten kya kya

banda puchhe ki tera hai koi lena dena

aur kuchh yaad na rahta tha laDai mein use

han magar mere guzishta ka hawala dena

us ki fitrat mein na tha tark-e-ta'alluq lekin

dusre shaKHs ko is nahj pe pahuncha dena

jaanta tha ki bahut KHak uDaega meri

koi aasan nahin tha use rasta dena

ye wo mansab hain jo apnon ko diye jate hain

yaad kya rakhna ise aur bhula kya dena

kya pata KHud se chhiDi jang kahan le jae

jab bhi yaad aaun meri jaan ka sadqa dena

dil ka saman koi KHak KHaride us se

yaad hi jis ko na rahta ho baqaya dena

baat karne se gurezan nazar aate hain magar

KHatm hai hazrat-e-'jawwad' pe luqma dena