تم غیرت ناہید ہو تم زہرہ جبیں ہو

تم غیرت ناہید ہو تم زہرہ جبیں ہو

تم کو نہیں معلوم کہ تم کتنے حسیں ہو

اک عمر سے مشتاق تجلی ہیں نگاہیں

آواز تو دو مجھ کو کہیں ہو کہ نہیں ہو

اس قرب میں بھی بعد کا ملتا ہے قرینہ

کہتے ہیں کہ تم میری رگ جاں کے قریں ہو

تکمیل عبادت کا یہی راز ہے زاہد

وہ نقش قدم باعث تزئین جبیں ہو

پڑھ کر نہ سنا ہم کو ستاروں کے صحیفے

شاید تری محفل میں کوئی خاک نشیں ہو

جس موڑ پہ بچھڑے تھے محبت کے مسافر

ممکن ہے ابھی قافلۂ وقت وہیں ہو

جو ضبط کی تحویل میں رہ جائے سمٹ کر

وہ قطرۂ خوں کیوں نہ محبت کا نگیں ہو

بیتاب تماشہ ہے جمال رخ جاناں

موجود کوئی دیکھنے والا تو کہیں ہو

کہتی ہیں طفیلؔ اب یہ بہاروں کی ہوائیں

پھولوں کی تمنا ہے تو کانٹوں کے قریں ہو