tum ho bazm-e-aish hai wan aur sohbat-dariyan

tum ho bazm-e-aish hai vaañ aur sohbat-dāriyāñ

ham haiñ kunj-e-ġham hai yaañ aur jaan se bezāriyāñ

tum ko sair-e-bāġh-o-gul-gasht-e-chaman kā vaañ hai shauq

yaañ badan par haiñ hujūm-e-dāġh se gul-kāriyāñ

dhyān hai ārā.ish-e-zulf-e-pareshāñ kā tumheñ

yaad haiñ hāl-e-pareshāñ kī mirī kuchh ḳhvāriyāñ

tum safā-e-sā.id-o-bāzū dikhāte ho vahāñ

ham pe yaañ mū-e-badan karte haiñ nashtar-dāriyāñ

tum ne dikhlā.ī vahāñ piiTh aur choTī kī phaban

yaañ mirī chhātī pe haiñ kaale ne lahreñ māriyāñ

nek-o-bad donoñ se yaañ ham ne to āñkheñ muuñd liiñ

tum vahāñ chitvan kī dikhlāte ho jādū-kāriyāñ

yaañ ba-rañg-e-paikar-e-tasvīr ham ḳhāmosh haiñ

guftugū kī tum dikhāte ho vahāñ tarrāriyāñ

qahqahe tum mārte ho vaañ ba-āvāz-e-buland

dushmanoñ se yaañ chhupā kar ham haiñ karte zāriyāñ

har marīz-e-ġham kī jāñ-baḳhshī kā hai vaañ tum ko dhyān

khiñch ga.iiñ yaañ tūl-e-shiddat se mirī bīmāriyāñ

iztirāb-e-dil se be-parda huā yaañ rāz-e-ishq

sūjhtī haiñ vaañ tumheñ har baat meñ tahdāriyāñ

kyā kisī se baat kiije bhūlte ik dam nahīñ

un bhalāoñ se vo bātoñ meñ tirī ayyāriyāñ

chhīn kar bātoñ meñ dil ko 'lutf' se vo but bane

yaad rakhnā ġhair kī karnā vahāñ dil-dāriyāñ

tum ho bazm-e-aish hai wan aur sohbat-dariyan

hum hain kunj-e-gham hai yan aur jaan se bezariyan

tum ko sair-e-bagh-o-gul-gasht-e-chaman ka wan hai shauq

yan badan par hain hujum-e-dagh se gul-kariyan

dhyan hai aaraish-e-zulf-e-pareshan ka tumhein

yaad hain haal-e-pareshan ki meri kuchh KHwariyan

tum safa-e-said-o-bazu dikhate ho wahan

hum pe yan mu-e-badan karte hain nashtar-dariyan

tum ne dikhlai wahan piTh aur choTi ki phaban

yan meri chhati pe hain kale ne lahren mariyan

nek-o-bad donon se yan hum ne to aankhen mund lin

tum wahan chitwan ki dikhlate ho jadu-kariyan

yan ba-rang-e-paikar-e-taswir hum KHamosh hain

guftugu ki tum dikhate ho wahan tarrariyan

qahqahe tum marte ho wan ba-awaz-e-buland

dushmanon se yan chhupa kar hum hain karte zariyan

har mariz-e-gham ki jaan-baKHshi ka hai wan tum ko dhyan

khinch gain yan tul-e-shiddat se meri bimariyan

iztirab-e-dil se be-parda hua yan raaz-e-ishq

sujhti hain wan tumhein har baat mein tahdariyan

kya kisi se baat kije bhulte ek dam nahin

un bhalaon se wo baaton mein teri ayyariyan

chhin kar baaton mein dil ko 'lutf' se wo but bane

yaad rakhna ghair ki karna wahan dil-dariyan