tum jahan the wahan ke the hi nahin

tum jahāñ the vahāñ ke the hī nahīñ

ya.anī tum is jahāñ ke the hī nahīñ

kaise uljhe haiñ kār-e-duniyā meñ

ham jo sūd-o-ziyāñ ke the hī nahīñ

maiñ to ik vahshat-e-digar meñ thā

mas.ale jism-o-jāñ ke the hī nahīñ

dasht-e-jāñ se nigāh-e-yār talak

rāste darmiyāñ ke the hī nahīñ

kyuuñ mirī dāstāñ kā hissa haiñ

jo mirī dāstāñ ke the hī nahīñ

ḳhvāb be-barg-o-bār kaise hue

jab ki ye din ḳhizāñ ke the hī nahīñ

tum jahan the wahan ke the hi nahin

yani tum is jahan ke the hi nahin

kaise uljhe hain kar-e-duniya mein

hum jo sud-o-ziyan ke the hi nahin

main to ek wahshat-e-digar mein tha

masale jism-o-jaan ke the hi nahin

dasht-e-jaan se nigah-e-yar talak

raste darmiyan ke the hi nahin

kyun meri dastan ka hissa hain

jo meri dastan ke the hi nahin

KHwab be-barg-o-bar kaise hue

jab ki ye din KHizan ke the hi nahin