تم مرے دل میں رہو حسرت و ارماں ہو کر

تم مرے دل میں رہو حسرت و ارماں ہو کر

خانۂ دل نہ مٹے خانۂ ویراں ہو کر

مہ و انجم رخ پر نور پہ قرباں ہو کر

چاہ میں تیری رہے چاہ زنخداں ہو کر

حق نے محبوب کو دیکھا تو کہا یہ ہنس کے

میری تصویر بنے بیٹھے ہو انساں ہو کر

ساتھ رہنے سے محبت بھی تو ہو جاتی ہے

کیوں کہیں جائے ہماری شب ہجراں ہو کر

تو وہ تصویر ہے تصویر تری کھینچ نہ سکی

جل اٹھے لوح و قلم سرو چراغاں ہو کر

دید کا شوق ہے جس کو وہ نظارہ کر لے

سامنے بیٹھے ہیں وہ سرو چراغاں ہو کر

دونوں عالم ہیں تری برق نظر سے گھائل

تیر بن کر کہیں چمکی کہیں پیکاں ہو کر

لذت گردش و آفات مسلسل مت پوچھ

جب مرض حد سے بڑھا رہ گیا درماں ہو کر

شعر کہہ کر بھی میں گمنام ابھی تک ہوں قدیرؔ

یہی مصرع مرا رہ جائے گا دیواں ہو کر