tum mujhe DhunDte rah jaoge pagal ki tarah

tum mujhe DhūñDte rah jāoge pāgal kī tarah

maiñ chalā jā.ūñgā barsāt ke bādal kī tarah

jāntā huuñ ki nigāhoñ se girā doge mujhe

kyoñ sajāte ho mujhe aañkh meñ kājal kī tarah

paañv jis vaqt uThātā huuñ maiñ manzil kī taraf

uljhaneñ raah meñ aa jaatī hai daldal kī tarah

ab to sone bhī nahīñ detī tirī yaad mujhe

mere ḳhvāboñ meñ khanak uThtī hai paa.el kī tarah

be-ruḳhī ne tirī is moḌ pe pahuñchāyā hai

ab to bastī meñ bhī Dar lagtā hai jangal kī tarah

tum mujhe DhunDte rah jaoge pagal ki tarah

main chala jaunga barsat ke baadal ki tarah

jaanta hun ki nigahon se gira doge mujhe

kyon sajate ho mujhe aankh mein kajal ki tarah

panw jis waqt uThata hun main manzil ki taraf

uljhanen rah mein aa jati hai daldal ki tarah

ab to sone bhi nahin deti teri yaad mujhe

mere KHwabon mein khanak uThti hai pael ki tarah

be-ruKHi ne teri is moD pe pahunchaya hai

ab to basti mein bhi Dar lagta hai jangal ki tarah