tumne jo bhi kaha hua to nahin

tum ne jo bhī kahā huā to nahīñ

merā sach bolnā burā to nahīñ

ye jo sarhad ke paar se aa.ī

ye kahīñ merī hī sadā to nahīñ

terī har baat maan luuñ kaise

tū mirā 'ishq hai ḳhudā to nahīñ

us ke siine meñ dil dhaḌaktā hai

vaise vo shaḳhs māntā to nahīñ

mujh ko jādūgarī nahīñ aatī

shā'ira huuñ maiñ sāhira to nahīñ

aaj kī raat kyoñ pareshāñ huuñ

kal kahīñ us kā sāmnā to nahīñ

marne vaale kā naam zinda hai

is kā matlab hai vo marā to nahīñ

āḳhir-e-kār maiñ bhī insāñ huuñ

aap ko mujh se mas.ala to nahīñ

maiñ tujhe kis tarah se samjhā.ūñ

shā'irī hai ye falsafa to nahīñ

aaj maiñ kuchh ziyāda bol ga.ī

aap kā dil kahīñ dukhā to nahīñ

tum ne jo bhi kaha hua to nahin

mera sach bolna bura to nahin

ye jo sarhad ke par se aai

ye kahin meri hi sada to nahin

teri har baat man lun kaise

tu mera 'ishq hai KHuda to nahin

us ke sine mein dil dhaDakta hai

waise wo shaKHs manta to nahin

mujh ko jadugari nahin aati

sha'ira hun main sahira to nahin

aaj ki raat kyon pareshan hun

kal kahin us ka samna to nahin

marne wale ka nam zinda hai

is ka matlab hai wo mara to nahin

aaKHir-e-kar main bhi insan hun

aap ko mujh se masala to nahin

main tujhe kis tarah se samjhaun

sha'iri hai ye falsafa to nahin

aaj main kuchh ziyaada bol gai

aap ka dil kahin dukha to nahin