tumne jo insan ho kar baat insani nahin ki

tum ne jo insān ho kar baat insānī nahīñ kī

kar to sakte the koī harkat jo shaitānī nahīñ kī

kyoñ hameñ buniyād hone kī ġhalat-fahmī rahī ye

kyoñ hamāre dil ne saarī 'umr man-mānī nahīñ kī

paas koī jo sunāne ke liye qissa nahīñ hai

ho rahā afsos ye kyoñ ham ne nādānī nahīñ kī

dhuup meñ ik peḌ kā saayā mayassar ho gayā to

bādaloñ kī chhāñv kī har vaqt nigrānī nahīñ kī

jo charāġhoñ kī tarah jalte rahe us raat ko ham

to ḳhudā ne bhī havā us roz tūfānī nahīñ kī

raaz saare khul ga.e nākām dil ke tab hamāre

dil-jale kī baat par jab ham ne hairānī nahīñ kī

ham ne ik 'mā'sūm' ko jab bechte dekhā khilaune

phir kabhī harkat hamāre dil ne bachkānī nahīñ kī

tum ne jo insan ho kar baat insani nahin ki

kar to sakte the koi harkat jo shaitani nahin ki

kyon hamein buniyaad hone ki ghalat-fahmi rahi ye

kyon hamare dil ne sari 'umr man-mani nahin ki

pas koi jo sunane ke liye qissa nahin hai

ho raha afsos ye kyon hum ne nadani nahin ki

dhup mein ek peD ka saya mayassar ho gaya to

baadalon ki chhanw ki har waqt nigrani nahin ki

jo charaghon ki tarah jalte rahe us raat ko hum

to KHuda ne bhi hawa us roz tufani nahin ki

raaz sare khul gae nakaam dil ke tab hamare

dil-jale ki baat par jab hum ne hairani nahin ki

hum ne ek 'ma'sum' ko jab bechte dekha khilaune

phir kabhi harkat hamare dil ne bachkani nahin ki