tumne kyon hans ke mujhe ek nazar dekh liya

tum ne kyoñ hañs ke mujhe ek nazar dekh liyā

aaj kyā aa ga.ī jī meñ jo idhar dekh liyā

ham kis ummīd pe ā.inda koī aah kareñ

ham ne kis aah ko mamnūn-e-asar dekh liyā

karvaTeñ lete hue tum bhī tasavvur meñ mile

tum ko bhī zīnat-e-āġhosh-e-nazar dekh liyā

tere bīmār ko kyoñ dekhne aa.e the tabīb

pyaar kī aañkh se tū ne na udhar dekh liyā

kyoñ ḳhafā hote ho kyoñ paḌ ga.ī māthe pe shikan

kyā huā chashm-e-mohabbat se agar dekh liyā

girtī paḌtī lab-e-'qaisar' se duā niklī hai

ye hī āsār-e-asar haiñ to asar dekh liyā

tum ne kyon hans ke mujhe ek nazar dekh liya

aaj kya aa gai ji mein jo idhar dekh liya

hum kis ummid pe aainda koi aah karen

hum ne kis aah ko mamnun-e-asar dekh liya

karwaTen lete hue tum bhi tasawwur mein mile

tum ko bhi zinat-e-aghosh-e-nazar dekh liya

tere bimar ko kyon dekhne aae the tabib

pyar ki aankh se tu ne na udhar dekh liya

kyon KHafa hote ho kyon paD gai mathe pe shikan

kya hua chashm-e-mohabbat se agar dekh liya

girti paDti lab-e-'qaisar' se dua nikli hai

ye hi aasar-e-asar hain to asar dekh liya