tum sath kya hue ki hue be-qarar log

tum saath kyā hue ki hue be-qarār log

muḌ-muḌ ke dekhte haiñ hameñ bār-bār log

aa.e to apne saath meñ laa.e bahār log

jaane lage to le ga.e dil kā qarār log

chhūTā kahāñ pe kaun kisī ko ḳhabar nahīñ

karte nahīñ kisī kā yahāñ intizār log

apnā.eñ kis ko kis pe bharosa kareñ yahāñ

jitne hameñ mile mile be-e'tibār log

rūdād-e-ġham unheñ to sunānā fuzūl hai

sunte haiñ kab kisī kī havā par savār log

yuuñ apnī zindagī ko liye phir rahe haiñ ham

jaise kahīñ Thaharte nahīñ haiñ farār log

us vaqt ek shaḳhs kī hotī hai aañkh nam

jis vaqt mujh pe hañste haiñ be-iḳhtiyār log

'gulshan' tamām 'umr to kāñToñ meñ kaaT dī

marne ke baa'd laa.e haiñ phūloñ ke haar log

tum sath kya hue ki hue be-qarar log

muD-muD ke dekhte hain hamein bar-bar log

aae to apne sath mein lae bahaar log

jaane lage to le gae dil ka qarar log

chhuTa kahan pe kaun kisi ko KHabar nahin

karte nahin kisi ka yahan intizar log

apnaen kis ko kis pe bharosa karen yahan

jitne hamein mile mile be-e'tibar log

rudad-e-gham unhen to sunana fuzul hai

sunte hain kab kisi ki hawa par sawar log

yun apni zindagi ko liye phir rahe hain hum

jaise kahin Thaharte nahin hain farar log

us waqt ek shaKHs ki hoti hai aankh nam

jis waqt mujh pe hanste hain be-iKHtiyar log

'gulshan' tamam 'umr to kanTon mein kaT di

marne ke ba'd lae hain phulon ke haar log