تم سمجھ پاتے مری طرز بیاں ایسی نہ تھی

تم سمجھ پاتے مری طرز بیاں ایسی نہ تھی

اور پھر دلچسپ بھی کچھ داستاں ایسی نہ تھی

کیسی رت تھی سبز امیدیں بھی پیلی پڑ گئیں

اب سے پہلے میرے کوچہ میں خزاں ایسی نہ تھی

تلخیاں دن بھر کی بوجھل شام شب کے رتجگے

زندگی مشکل تو تھی نامہرباں ایسی نہ تھی

حال تو دریافت کر لیتے تھے اب وہ بھی نہیں

خامشی پہلے ہمارے درمیاں ایسی نہ تھی

اب نہ ہونٹوں پر تبسم ہے نہ نغمے ہیں نہ شعر

اب سے پہلے میرے ہونٹوں پر فغاں ایسی نہ تھی

چار سو پھیلا ہے اب تو ایک بس فرقت کا رنگ

اب تلک یک رنگ تصویر جہاں ایسی نہ تھی