tumhaare nam ghazal ki kitab kar dega

tumhāre naam ġhazal kī kitāb kar degā

vo chāl-bāz tumheñ bhī ḳharāb kar degā

mujhe ye vahm rahā hai tirī mohabbat meñ

ki mujh ko dhuup meñ phirnā gulāb kar degā

isī umiid pe us kī misāl DhūñDī nahīñ

vo lā-javāb mujhe lā-javāb kar degā

na apne haath baḌhāo sharāb kī jānib

mirā ḳhudā tumheñ mast-e-shabāb kar degā

abhī to ḳhush huuñ tire 'ishq meñ bahut ḳhush huuñ

ye ek din mirā jiinā 'azāb kar degā

abhī na pūchh ki kitnī thiiñ hijr kī rāteñ

kabhī ye dil tire ġham kā hisāb kar degā

maiñ kah rahā huuñ udāsī meñ mubtalā hai vo

use na mil tujhe 'anjum' ḳharāb kar degā

tumhaare nam ghazal ki kitab kar dega

wo chaal-baz tumhein bhi KHarab kar dega

mujhe ye wahm raha hai teri mohabbat mein

ki mujh ko dhup mein phirna gulab kar dega

isi umid pe us ki misal DhunDi nahin

wo la-jawab mujhe la-jawab kar dega

na apne hath baDhao sharab ki jaanib

mera KHuda tumhein mast-e-shabab kar dega

abhi to KHush hun tere 'ishq mein bahut KHush hun

ye ek din mera jina 'azab kar dega

abhi na puchh ki kitni thin hijr ki raaten

kabhi ye dil tere gham ka hisab kar dega

main kah raha hun udasi mein mubtala hai wo

use na mil tujhe 'anjum' KHarab kar dega