تمھارے نام غزل کی کتاب کر دے گا

تمھارے نام غزل کی کتاب کر دے گا

وہ چال باز تمہیں بھی خراب کر دے گا

مجھے یہ وہم رہا ہے تری محبت میں

کہ مجھ کو دھوپ میں پھرنا گلاب کر دے گا

اسی امید پہ اس کی مثال ڈھونڈی نہیں

وہ لاجواب مجھے لاجواب کر دے گا

نہ اپنے ہاتھ بڑھاؤ شراب کی جانب

مرا خدا تمہیں مست شباب کر دے گا

ابھی تو خوش ہوں ترے عشق میں بہت خوش ہوں

یہ ایک دن مرا جینا عذاب کر دے گا

ابھی نہ پوچھ کہ کتنی تھیں ہجر کی راتیں

کبھی یہ دل ترے غم کا حساب کر دے گا

میں کہہ رہا ہوں اداسی میں مبتلا ہے وہ

اسے نہ مل تجھے انجمؔ خراب کر دے گا