تمہاری دید کی راہیں تلاش کرتی ہیں

تمہاری دید کی راہیں تلاش کرتی ہیں

تمہیں اداس نگاہیں تلاش کرتی ہیں

اب ان کی آنکھ کھلی ہے کہ جب وہ دل نہ رہا

جسے اب ان کی نگاہیں تلاش کرتی ہیں

وہ جس کو لوٹ لیا تھا کبھی محبت نے

اب اس شباب کو آہیں تلاش کرتی ہیں

میں وہ مسافر راہ وفا ہوں اب جس کو

تمہارے شہر کی راہیں تلاش کرتی ہیں

تلاش راہ میں کچھ راہ بھول جاتے ہیں

کچھ ایسے ہیں جنہیں راہیں تلاش کرتی ہیں

شب فراق تصور میں مجھ کو سوزؔ اکثر

کسی کی مرمریں باہیں تلاش کرتی ہیں