tumhein khone ka hum ko gham nahin hai

tumheñ khone kā ham ko ġham nahīñ hai

milā hai jo vo tum se kam nahīñ hai

bhale hī pyaar kā mausam nahīñ hai

magar shikva tumhārā kam nahīñ hai

faqat haarā huuñ apne dostoñ se

ki dushman meñ to itnā dam nahīñ hai

kise apnā kaheñ duniyā meñ ab ham

hamārā koī bhī hamdam nahīñ hai

tujhe dekhā to aa.e in meñ aañsū

ye merī aañkh varna nam nahīñ hai

ye kaisā zaḳhm tum ne de diyā hai

ki is kā koī bhī marham nahīñ hai

tujhe paayā hai jab se maiñ ne jaanā

koī bhī paas mere ġham nahīñ hai

mirī barbādiyoñ pe hañsne vaalo

tumhāre paas meñ kyā ġham nahīñ hai

hameñ phir se madīne jaanā hogā

hamāre paas ab zamzam nahīñ hai

tumheñ 'naushād' ugāne hoñge sūraj

charāġhoñ meñ koī ab dam nahīñ hai

tumhein khone ka hum ko gham nahin hai

mila hai jo wo tum se kam nahin hai

bhale hi pyar ka mausam nahin hai

magar shikwa tumhaara kam nahin hai

faqat haara hun apne doston se

ki dushman mein to itna dam nahin hai

kise apna kahen duniya mein ab hum

hamara koi bhi hamdam nahin hai

tujhe dekha to aae in mein aansu

ye meri aankh warna nam nahin hai

ye kaisa zaKHm tum ne de diya hai

ki is ka koi bhi marham nahin hai

tujhe paya hai jab se main ne jaana

koi bhi pas mere gham nahin hai

meri barbaadiyon pe hansne walo

tumhaare pas mein kya gham nahin hai

hamein phir se madine jaana hoga

hamare pas ab zamzam nahin hai

tumhein 'naushad' ugane honge suraj

charaghon mein koi ab dam nahin hai