tumhein kya kaam nalon se tumhein kya kaam aahon se

tumheñ kyā kaam nāloñ se tumheñ kyā kaam aahoñ se

chhupāyā ho gunāh-e-ishq to pūchho gavāhoñ se

maiñ kajkol-e-dil-e-be-mudda.ā le kar kahāñ jā.ūñ

ye paiġhām-e-talab kyuuñ ūñchī ūñchī bārgāhoñ se

zabāñ ho ek ulfat kī to mumkin hai zabāñ-bandī

hui jo baat chupke kī vo kah Daalī nigāhoñ se

mohabbat andar andar ziist kā naqsha palaTtī hai

yahī chaltī hui sāñseñ badal jā.eñgī aahoñ se

sanad be-ai.tmādi kī hai qabl-e-imtihāñ goyā

bayān-e-hāl kai pahle halaf lenā gavāhoñ se

mohabbat nek-o-bad ko sochne de ġhair mumkin hai

baḌhī jab be-ḳhudī phir kaun Dartā hai gunāhoñ se

hue jab aap se bāhar phir ehsās-e-duī kaisā

pata manzil kā miltā hai inhīñ gum-karda rāhoñ se

batā saktī nahīñ ruīdgī-e-sabza-o-gul bhī

faqīroñ se paTe the ye gaḌhe yā bādshāhoñ se

chhalakte zarf kā khultā bharam khotā hai baat apnī

sukūñ paatā hai dil kā dard nāloñ se na aahoñ se

ye pahle soch leñ āñkhoñ meñ lahrāte hue aañsū

ki vo phir uTh bhī sakte haiñ jo gir jaa.eñ nigāhoñ se

milā baiThā hai sab meñ kuchh magar muñh se nahīñ kahtā

alag samjho tum apne 'ārzū' ko dād-ḳhvāhoñ se

tumhein kya kaam nalon se tumhein kya kaam aahon se

chhupaya ho gunah-e-ishq to puchho gawahon se

main kajkol-e-dil-e-be-muddaa le kar kahan jaun

ye paigham-e-talab kyun unchi unchi bargahon se

zaban ho ek ulfat ki to mumkin hai zaban-bandi

hui jo baat chupke ki wo kah Dali nigahon se

mohabbat andar andar zist ka naqsha palaTti hai

yahi chalti hui sansen badal jaengi aahon se

sanad be-aitmadi ki hai qabl-e-imtihan goya

bayan-e-haal kai pahle halaf lena gawahon se

mohabbat nek-o-bad ko sochne de ghair mumkin hai

baDhi jab be-KHudi phir kaun Darta hai gunahon se

hue jab aap se bahar phir ehsas-e-dui kaisa

pata manzil ka milta hai inhin gum-karda rahon se

bata sakti nahin ruidgi-e-sabza-o-gul bhi

faqiron se paTe the ye gaDhe ya baadshahon se

chhalakte zarf ka khulta bharam khota hai baat apni

sukun pata hai dil ka dard nalon se na aahon se

ye pahle soch len aankhon mein lahraate hue aansu

ki wo phir uTh bhi sakte hain jo gir jaen nigahon se

mila baiTha hai sab mein kuchh magar munh se nahin kahta

alag samjho tum apne 'arzu' ko dad-KHwahon se