تمہیں مل کر بھی اکثر دل کے ارماں دل میں رہتے ہیں

تمہیں مل کر بھی اکثر دل کے ارماں دل میں رہتے ہیں

تمہارے چاہنے والے بڑی مشکل میں رہتے ہیں

اسے ناشاد کرنے کا اسے برباد کرنے کا

گلہ ہے تو انہیں سے ہے جو میرے دل میں رہتے ہیں

رضاکاران الفت موت سے ہرگز نہیں ڈرتے

ہمیں دیکھو کہ ہر دم کوچۂ قاتل میں رہتے ہیں

جنوں کی خامکاری چین لینے ہی نہیں دیتی

ہم ان کو ڈھونڈتے ہیں جو ہمارے دل میں رہتے ہیں

تلاش یار کی فرصت اگر ہوگی تو کر لیں گے

ابھی تو رات دن ہم جستجوئے دل میں رہتے ہیں

کبھی تو غور کر لیں قصۂ خضر و سکندر پر

وہ رہرو جو تلاش رہبر کامل میں رہتے ہیں

ہمیں کو اے خدا کچھ ہو گیا ہے یا زمانے کو

ہمارے ہی گلے شکوے ہر اک محفل میں رہتے ہیں

دل بیمار کی حالت نہ بدلی ہے نہ بدلے گی

ہمارے چارہ گر کیوں سعئ لا حاصل میں رہتے ہیں

دل ناداں کی عادت سے بہت بیزار ہوں ساحرؔ

یہ حضرت ہر گھڑی اک فکر لا حاصل میں رہتے ہیں