تو اگر درمیاں نہیں ہوتا

تو اگر درمیاں نہیں ہوتا

عشق کا امتحاں نہیں ہوتا

تیرے قدموں کی خاک ہوتا میں

قالب جسم و جاں نہیں ہوتا

تجھ سے سب کچھ جو تو نہیں ہوتا

کچھ بھی اے میری جاں نہیں ہوتا

جو کروں نذر جسم جان کہ دل

تیرے شایان شاں نہیں ہوتا

بات کرتا ہوں روبرو تجھ سے

جب کوئی درمیاں نہیں ہوتا

وصل کی آرزو نہ ہو جس کو

ہجر اس پر گراں نہیں ہوتا

مسکرا تو رہا ہوں محفل میں

پر غم دل نہاں نہیں ہوتا

درد اگر درد عشق نے ہوتا

وجہ تسکین جاں نہیں ہوتا

لفظ ہرچند آئنے ہیں مگر

دل میں جو ہے عیاں نہیں ہوتا

چشم بھی بولتی ہے چہرہ بھی

لفظ ہی ترجماں نہیں ہوتا