tu be-KHabar ho to kuchh haal-e-dil sunaun tujhe

tū be-ḳhabar ho to kuchh hāl-e-dil sunā.ūñ tujhe

jo zaḳhm tū ne diye haiñ maiñ kyā dikhā.ūñ tujhe

qarīb aa ke kabhī baiTh be-niyāz mire

ki merā terā ta'alluq hai kyā batā.ūñ tujhe

maiñ dhuup rok ke sūraj ke sāmne ho jā.ūñ

aur apnī chhāñv meñ ghar aa.e to biThā.ūñ tujhe

maiñ but-parast na patthar kā koī but hai tū

ye kyā ki tū na sune merī jab bulā.ūñ tujhe

kabhī mujhe mire kāñdhe pe haath rakh ke bulā

palaT ke dekhūñ to apne qarīb pā.ūñ tujhe

tū nuur hai to ujāloñ se merā ghar bhar de

ki shaam ho to diye kī tarah jalā.ūñ tujhe

sunā sunā ke mujhe qisse mat Darā mujh ko

tū ek sho'la sahī aa gale lagā.ūñ tujhe

lapeT rakkhā hai uñglī pe vaqt ko maiñ ne

azal dikhā.ūñ ki roz-e-abad dikhā.ūñ tujhe

vo hañs rahā hai pas-e-parda dekh kar mujh ko

ab aise apnā tamāsha bhī kyā dikhā.ūñ tujhe

maiñ apnā dil tire siine meñ ab ke rakh dūñgā

ye sochtā huuñ ki ik baar phir banā.ūñ tujhe

ye rāsta ki jidhar 'zeb' jā rahe haiñ ham

pata nahīñ mujhe ḳhud bhī to kyā batā.ūñ tujhe

tu be-KHabar ho to kuchh haal-e-dil sunaun tujhe

jo zaKHm tu ne diye hain main kya dikhaun tujhe

qarib aa ke kabhi baiTh be-niyaz mere

ki mera tera ta'alluq hai kya bataun tujhe

main dhup rok ke suraj ke samne ho jaun

aur apni chhanw mein ghar aae to biThaun tujhe

main but-parast na patthar ka koi but hai tu

ye kya ki tu na sune meri jab bulaun tujhe

kabhi mujhe mere kandhe pe hath rakh ke bula

palaT ke dekhun to apne qarib paun tujhe

tu nur hai to ujalon se mera ghar bhar de

ki sham ho to diye ki tarah jalaun tujhe

suna suna ke mujhe qisse mat Dara mujh ko

tu ek sho'la sahi aa gale lagaun tujhe

lapeT rakkha hai ungli pe waqt ko main ne

azal dikhaun ki roz-e-abad dikhaun tujhe

wo hans raha hai pas-e-parda dekh kar mujh ko

ab aise apna tamasha bhi kya dikhaun tujhe

main apna dil tere sine mein ab ke rakh dunga

ye sochta hun ki ek bar phir banaun tujhe

ye rasta ki jidhar 'zeb' ja rahe hain hum

pata nahin mujhe KHud bhi to kya bataun tujhe