tu gaya lekin teri yaaden yahan par rah gain

tū gayā lekin tirī yādeñ yahāñ par rah ga.iiñ

baad tere bas tirī bāteñ zabāñ par rah ga.iiñ

pahle terī zaat kā paikar kahīñ par gum huā

aur na jaane phir tirī yādeñ kahāñ par rah ga.iiñ

aaj phir aisā huā jab soch kar tujh ko ai dost

āsmāñ taktī nigāheñ āsmāñ par rah ga.iiñ

kyā sitam hai kal talak jo sāmne āñkhoñ ke thiiñ

aaj vo sab sūrateñ vahm-o-gumāñ par rah ga.iiñ

dāstān-e-zindagī ke harf kab ke miT chuke

kuchh lakīreñ sī faqat ab dāstāñ par rah ga.iiñ

vaqt-e-āḳhir chal diye tanhā safar kī aur ham

sab kī sab chīzeñ jahāñ kī is jahāñ par rah ga.iiñ

tu gaya lekin teri yaaden yahan par rah gain

baad tere bas teri baaten zaban par rah gain

pahle teri zat ka paikar kahin par gum hua

aur na jaane phir teri yaaden kahan par rah gain

aaj phir aisa hua jab soch kar tujh ko ai dost

aasman takti nigahen aasman par rah gain

kya sitam hai kal talak jo samne aankhon ke thin

aaj wo sab suraten wahm-o-guman par rah gain

dastan-e-zindagi ke harf kab ke miT chuke

kuchh lakiren si faqat ab dastan par rah gain

waqt-e-aKHir chal diye tanha safar ki aur hum

sab ki sab chizen jahan ki is jahan par rah gain