tu mile ya na mile zikr to tera hoga

tū mile yā na mile zikr to terā hogā

ham se tanhā na shab-e-ġham kā saverā hogā

vo jo ik shaḳhs pareshāñ hai judā hai tum se

us ko kuchh aur hī hālāt ne gherā hogā

is ghaḌī apnī nigāhoñ meñ basā le mujh ko

kal ḳhudā jaane kahāñ apnā baserā hogā

tum se mahrūmī kā ehsās jalā.egā mujhe

tum hī yaad aaoge jis dam koī merā hogā

shaam aa.e to samajhnā ki hamāre dil meñ

yaas kā dard judā.ī kā añdherā hogā

is liye jaltī huuñ har shaam kī tanhā.ī meñ

sochtī huuñ tirī rāhoñ meñ añdherā hogā

kis kī ḳhushbū liye phirtī hai zamāne meñ 'nasīm'

gul ke parde se suḳhan phir vahī terā hogā

tu mile ya na mile zikr to tera hoga

hum se tanha na shab-e-gham ka sawera hoga

wo jo ek shaKHs pareshan hai juda hai tum se

us ko kuchh aur hi haalat ne ghera hoga

is ghaDi apni nigahon mein basa le mujh ko

kal KHuda jaane kahan apna basera hoga

tum se mahrumi ka ehsas jalaega mujhe

tum hi yaad aaoge jis dam koi mera hoga

sham aae to samajhna ki hamare dil mein

yas ka dard judai ka andhera hoga

is liye jalti hun har sham ki tanhai mein

sochti hun teri rahon mein andhera hoga

kis ki KHushbu liye phirti hai zamane mein 'nasim'

gul ke parde se suKHan phir wahi tera hoga