تو مرے ساتھ چل نہیں سکتا

تو مرے ساتھ چل نہیں سکتا

میں بھی رستہ بدل نہیں سکتا

میں تو گر کر سنبھل بھی جاؤں گا

تو گرا تو سنبھل نہیں سکتا

میں تو ڈوبوں گا ہی مگر تو بھی

اس بھنور سے نکل نہیں سکتا

اس طرح منجمد ہوں ماضی میں

آنسوؤں سے پگھل نہیں سکتا

لو مرا امتحاں جو لازم ہے

میں کسی طور ٹل نہیں سکتا

ہے جو جذبہ تری محبت میں

میرے شعروں میں ڈھل نہیں سکتا

ملک طالب ہے پختہ کاری کا

صرف وعدوں پہ پل نہیں سکتا

تم جلا سکتے ہو مجھے ساگرؔ

میرا دیوان جل نہیں سکتا