tu nahin hai agar to koi gham nahin

tū nahīñ hai agar to koī ġham nahīñ

terī yādoñ kī lazzat mujhe kam nahīñ

gā nahīñ pā.ūñgā 'ishq ke giit maiñ

zindagī ab bahāroñ kā mausam nahīñ

jā chukī hai javānī to kab kī mirī

dil meñ lau pyaar kī ab bhī maddham nahīñ

ḳhaak tum ko mile manzil-e-ārzū

'azm hī jab tumhārā musammam nahīñ

mujh ko duniyā zamāne se kyā vāsta

mujh ko tū chāhiye saarā 'ālam nahīñ

tujh se bāteñ to karne kā man hai bahut

jumbish-e-lab kā mujh meñ magar dam nahīñ

dhuup hī kī tapish meñ hai rahnā abhī

un ke gesū abhī ruḳh pe barham nahīñ

is qadar nāz-o-andāz ab kis liye

naujavānī kā ab tujh meñ 'ālam nahīñ

tu nahin hai agar to koi gham nahin

teri yaadon ki lazzat mujhe kam nahin

ga nahin paunga 'ishq ke git main

zindagi ab bahaaron ka mausam nahin

ja chuki hai jawani to kab ki meri

dil mein lau pyar ki ab bhi maddham nahin

KHak tum ko mile manzil-e-arzu

'azm hi jab tumhaara musammam nahin

mujh ko duniya zamane se kya wasta

mujh ko tu chahiye sara 'alam nahin

tujh se baaten to karne ka man hai bahut

jumbish-e-lab ka mujh mein magar dam nahin

dhup hi ki tapish mein hai rahna abhi

un ke gesu abhi ruKH pe barham nahin

is qadar naz-o-andaz ab kis liye

naujawani ka ab tujh mein 'alam nahin