تو نہیں ہے اگر تو کوئی غم نہیں

تو نہیں ہے اگر تو کوئی غم نہیں

تیری یادوں کی لذت مجھے کم نہیں

گا نہیں پاؤں گا عشق کے گیت میں

زندگی اب بہاروں کا موسم نہیں

جا چکی ہے جوانی تو کب کی مری

دل میں لو پیار کی اب بھی مدھم نہیں

خاک تم کو ملے منزل آرزو

عزم ہی جب تمہارا مصمم نہیں

مجھ کو دنیا زمانے سے کیا واسطہ

مجھ کو تو چاہیے سارا عالم نہیں

تجھ سے باتیں تو کرنے کا من ہے بہت

جنبش لب کا مجھ میں مگر دم نہیں

دھوپ ہی کی تپش میں ہے رہنا ابھی

ان کے گیسو ابھی رخ پہ برہم نہیں

اس قدر ناز و انداز اب کس لیے

نوجوانی کا اب تجھ میں عالم نہیں