tu ne jise banaya usko bigaD Dala

tū ne jise banāyā us ko bigāḌ Daalā

ai charḳh maiñ ne apnī ‘arzī ko phaaḌ Daalā

barbād kyā ajal ne mujh ko kiyā ye kahiye

rūh-e-ravāñ ne apne dāman ko jhaaḌ Daalā

dastār-o-pairahan gum aur jeb-o-kīsa ḳhālī

tahzīb-e-maġhribī ne ham ko chithāḌ Daalā

buniyād-e-dīñ havā-e-duniyā ne munhadim kī

tūfān ne shajar ko jaḌ se ukhāḌ Daalā

achchhā milā natīja mujh ko murāsalat kā

qāsid ko qatl kar ke naame ko phaaḌ Daalā

tu ne jise banaya us ko bigaD Dala

ai charKH main ne apni ‘arzi ko phaD Dala

barbaad kya ajal ne mujh ko kiya ye kahiye

ruh-e-rawan ne apne daman ko jhaD Dala

dastar-o-pairahan gum aur jeb-o-kisa KHali

tahzib-e-maghribi ne hum ko chithaD Dala

buniyaad-e-din hawa-e-duniya ne munhadim ki

tufan ne shajar ko jaD se ukhaD Dala

achchha mila natija mujh ko murasalat ka

qasid ko qatl kar ke name ko phaD Dala