tu to bilkul patthar sa hai

tū to bilkul patthar sā hai

par mujh ko achchhā lagtā hai

tere shahr meñ kyā rakkhā hai

dil mujh ko phir le aayā hai

saarī galiyāñ ghuum chukā huuñ

terī galī se Dar lagtā hai

ab in saḌkoñ par tanhā huuñ

jin par kabhī tū saath chalā hai

chāñd ko dekh ke mujh ko hamesha

yaad tirā chehrā aatā hai

chāñd bādaloñ meñ chhup-chhup kar

mujh ko tang bahut kartā hai

paanī jis ko samajh rahā thā

vo to nazar kā ik dhokā hai

tujh ko maiñ kab bhuul sakā huuñ

tū to mujh ko bhuul chukā hai

yādeñ bhī kyā chiiz haiñ 'sādiq'

haal burā dil kā hotā hai

tu to bilkul patthar sa hai

par mujh ko achchha lagta hai

tere shahr mein kya rakkha hai

dil mujh ko phir le aaya hai

sari galiyan ghum chuka hun

teri gali se Dar lagta hai

ab in saDkon par tanha hun

jin par kabhi tu sath chala hai

chand ko dekh ke mujh ko hamesha

yaad tera chehra aata hai

chand baadalon mein chhup-chhup kar

mujh ko tang bahut karta hai

pani jis ko samajh raha tha

wo to nazar ka ek dhoka hai

tujh ko main kab bhul saka hun

tu to mujh ko bhul chuka hai

yaaden bhi kya chiz hain 'sadiq'

haal bura dil ka hota hai