tufan se bach ke daman-e-sahil mein rah gaya

tūfāñ se bach ke dāman-e-sāhil meñ rah gayā

mushkil ke ba.ad aur bhī mushkil meñ rah gayā

ik shor thā jo gosha-e-mahfil meñ rah gayā

ik dard thā jo dil se uThā dil meñ rah gayā

ab vo nigāh-e-nāz huī mā.il-e-karam

jab koī mudda.ā na mire dil meñ rah gayā

manzil mire qarīb se ho kar guzar ga.ī

aur maiñ talāsh-e-jāda-e-manzil meñ rah gayā

manzil fanā-e-zauq-e-talab kā maqām thī

achchhā huā maiñ sarhad-e-manzil meñ rah gayā

allāh-re jazb-e-ishq ki husn-e-nigāh-e-qais

ik naqsh ban ke parda-e-mahmil meñ rah gayā

naala to ḳhair nañg-e-ġham-e-ishq thā magar

naġhma bhī soz-o-sāz kī mahfil meñ rah gayā

saare hijāb-e-husn nigāhoñ se haT ga.e

ik aa.ina zarūr muqābil meñ rah gayā

mujh se ye pūchhtī haiñ mirī hichkiyāñ 'figār'

ab kitnā fāsla tirī manzil meñ rah gayā

tufan se bach ke daman-e-sahil mein rah gaya

mushkil ke baad aur bhi mushkil mein rah gaya

ek shor tha jo gosha-e-mahfil mein rah gaya

ek dard tha jo dil se uTha dil mein rah gaya

ab wo nigah-e-naz hui mail-e-karam

jab koi muddaa na mere dil mein rah gaya

manzil mere qarib se ho kar guzar gai

aur main talash-e-jada-e-manzil mein rah gaya

manzil fana-e-zauq-e-talab ka maqam thi

achchha hua main sarhad-e-manzil mein rah gaya

allah-re jazb-e-ishq ki husn-e-nigah-e-qais

ek naqsh ban ke parda-e-mahmil mein rah gaya

nala to KHair nang-e-gham-e-ishq tha magar

naghma bhi soz-o-saz ki mahfil mein rah gaya

sare hijab-e-husn nigahon se haT gae

ek aaina zarur muqabil mein rah gaya

mujh se ye puchhti hain meri hichkiyan 'figar'

ab kitna fasla teri manzil mein rah gaya