tufan tham chuka hai magar jagte raho

tūfān tham chukā hai magar jāgte raho

kis vaqt kī hai kis ko ḳhabar jāgte raho

sho.ale bujhā ke ham-safaro mutma.in na ho

poshīda raakh meñ hai sharar jāgte raho

ab raushnī meñ bhī hai añdheroñ kā makr-o-fan

kyā e'tibār-e-shām-o-sahar jāgte raho

har zarra-e-chaman meñ hai la.al-o-guhar kā rang

luTne na paa.eñ la.al-o-guhar jāgte raho

ab raat ḳhud hai apnī siyāhī se be-qarār

āvāz de rahī hai sahar jāgte raho

'sāġhar' ye ġham kī raat ye rāhoñ ke pech-o-ḳham

dushman bhī hai sharīk-e-safar jāgte raho

tufan tham chuka hai magar jagte raho

kis waqt ki hai kis ko KHabar jagte raho

shoale bujha ke ham-safaro mutmain na ho

poshida rakh mein hai sharar jagte raho

ab raushni mein bhi hai andheron ka makr-o-fan

kya e'tibar-e-sham-o-sahar jagte raho

har zarra-e-chaman mein hai lal-o-guhar ka rang

luTne na paen lal-o-guhar jagte raho

ab raat KHud hai apni siyahi se be-qarar

aawaz de rahi hai sahar jagte raho

'saghar' ye gham ki raat ye rahon ke pech-o-KHam

dushman bhi hai sharik-e-safar jagte raho