TuT jata hai sitaron ka bharam raat gae

TuuT jaatā hai sitāroñ kā bharam raat ga.e

jagmagāte haiñ tire naqsh-e-qadam raat ga.e

kyā batā.eñ jo guzartī hai hamāre dil par

yaad aate haiñ jab apnoñ ke sitam raat ga.e

ġharq ho jaatī hai jab niiñd meñ saarī duniyā

jaag uThte haiñ adīboñ ke qalam raat ga.e

roz aate haiñ sadā de ke chale jaate haiñ

dil ke darvāze pe kuchh ahl-e-karam raat ga.e

rok letī hai tirī yaad sahārā ban kar

Dagmagāte haiñ agar mere qadam raat ga.e

jin kī ummīd meñ ham din ko jiyā karte haiñ

TuuT jaate haiñ vahī qaul-o-qasam raat ga.e

jin kī qismat meñ nahīñ din kā ujālā 'mansūr'

un charāġhoñ meñ jalā karte haiñ ham raat ga.e

TuT jata hai sitaron ka bharam raat gae

jagmagate hain tere naqsh-e-qadam raat gae

kya bataen jo guzarti hai hamare dil par

yaad aate hain jab apnon ke sitam raat gae

gharq ho jati hai jab nind mein sari duniya

jag uThte hain adibon ke qalam raat gae

roz aate hain sada de ke chale jate hain

dil ke darwaze pe kuchh ahl-e-karam raat gae

rok leti hai teri yaad sahaara ban kar

Dagmagate hain agar mere qadam raat gae

jin ki ummid mein hum din ko jiya karte hain

TuT jate hain wahi qaul-o-qasam raat gae

jin ki qismat mein nahin din ka ujala 'mansur'

un charaghon mein jala karte hain hum raat gae