TuT ke patthar girte rahte hain din raat chaTanon se

TuuT ke patthar girte rahte haiñ din raat chaTānoñ se

sāvan kī barsāt kī sūrat barseñ tiir kamānoñ se

kaale kosoñ duur se āḳhir laa.e bhī to phul-jhaḌiyāñ

hiire bhī to mil sake the soch kī gahrī kānoñ se

is rañgīñ bāzār meñ koī kyā ḳhushbū kā dhyān kare

phūloñ ko maalī bhī parkhe rañgoñ ke paimānoñ se

raat sahar kī khoj meñ kitne diip jalā kar nikle the

kitne taare lauT ke aa.e haiñ kaale vīrānoñ se

taptī dhuup meñ kab se mūrakh aas lagā.e baiThā hai

chashme phuuT ke ba nikleñge retīle maidānoñ se

biitī ḳhushiyāñ bhī ab dhyān meñ aane se katrātī haiñ

raat ko log guzarte haiñ haT kar vīrān makānoñ se

'āmir' kaisā din guzrā hai aur ye kaisī shaam huī

pahroñ ḳhuun Tapakte dekhā sūraj kī shiryānoñ se

TuT ke patthar girte rahte hain din raat chaTanon se

sawan ki barsat ki surat barsen tir kamanon se

kale koson dur se aaKHir lae bhi to phul-jhaDiyan

hire bhi to mil sake the soch ki gahri kanon se

is rangin bazar mein koi kya KHushbu ka dhyan kare

phulon ko mali bhi parkhe rangon ke paimanon se

raat sahar ki khoj mein kitne dip jala kar nikle the

kitne tare lauT ke aae hain kale viranon se

tapti dhup mein kab se murakh aas lagae baiTha hai

chashme phuT ke ba niklenge retile maidanon se

biti KHushiyan bhi ab dhyan mein aane se katraati hain

raat ko log guzarte hain haT kar viran makanon se

'amir' kaisa din guzra hai aur ye kaisi sham hui

pahron KHun Tapakte dekha suraj ki shiryanon se