idhar aae to use pas bula kar dekhen

idhar aa.e to use paas bulā kar dekheñ

hāl-e-dil us ko zarā aaj sunā kar dekheñ

bazm-e-ishrat meñ jo rahtī hai musalsal raushan

aaj kī raat vahī sham.a bujhā kar dekheñ

zarre zarre meñ haiñ kitne hī manāzir raushan

aap palkoñ kī ye chilman to uThā kar dekheñ

zulmat-e-ġham meñ tajallī kā samāñ ho shāyad

aaj ham apne nasheman ko jalā kar dekheñ

kitne aks ubhre haiñ aur kitne hue haiñ ma.adūm

dil ke ā.īne ko ā.īna dikhā kar dekheñ

muddatoñ se hai jo pahlū meñ laraztā saaya

aaj ham is ko ujāloñ meñ sajā kar dekheñ

ye bhī ik rañg nayā ruup nayā ho shāyad

aaj ḳhud se hī zarā ḳhud ko chhupā kar dekheñ

idhar aae to use pas bula kar dekhen

haal-e-dil us ko zara aaj suna kar dekhen

bazm-e-ishrat mein jo rahti hai musalsal raushan

aaj ki raat wahi shama bujha kar dekhen

zarre zarre mein hain kitne hi manazir raushan

aap palkon ki ye chilman to uTha kar dekhen

zulmat-e-gham mein tajalli ka saman ho shayad

aaj hum apne nasheman ko jala kar dekhen

kitne aks ubhre hain aur kitne hue hain madum

dil ke aaine ko aaina dikha kar dekhen

muddaton se hai jo pahlu mein larazta saya

aaj hum is ko ujalon mein saja kar dekhen

ye bhi ek rang naya rup naya ho shayad

aaj KHud se hi zara KHud ko chhupa kar dekhen