ادھر مسافت منزل بہت زیادہ تھی

ادھر مسافت منزل بہت زیادہ تھی

ادھر جو سمت سفر تھی خلاف جادہ تھی

ورق ورق تھی اگرچہ ہمارے دل کی کتاب

عبارت اس کی مگر حرف حرف سادہ تھی

متاع عیش تھی اک چھاؤں ایسی چھاؤں کہ جو

کہیں نہ تھی کہیں کم تھی کہیں زیادہ تھی

وہ آج قافلے میں بھی نہیں جنہیں کل تک

تلاش منزل مقصود جادہ جادہ تھی

نہ جانے تنگ ہوئی ہم پہ کیوں زمین وطن

ہمارے واسطے کل تک تو یہ کشادہ تھی

قدم ہمارے در یار ہی پہ جا کے رکے

ہماری پیش روی گرچہ بے ارادہ تھی

وقارؔ آج کے لوگ اس سے بھی ہیں مستثنیٰ

ہمارے دور میں کچھ قدر استفادہ تھی