ummidon ko aag lagae rasta khole baiTha hun

ummīdoñ ko aag lagā.e rasta khole baiThā huuñ

merā 'ishq use piñjra thā piñjra khole baiThā huuñ

chāhe mujh ko shā'ir bolo chāhe mujh ko dīvāna

haath meñ kuchh ġhazloñ ko thāme māthā khole baiThā huuñ

vo ab jaane kis kī ḳhātir zulfeñ khole phirtī hai

maiñ ab jaane kis kī ḳhātir siina khole baiThā huuñ

dil koī kashkol hai thoḌī jo ḳhairāt se bhar jaa.e

kul īmān sameTe aao kā'ba khole baiThā huuñ

kaun ḳhudā tārīḳh se laḌ kar ḳhauf kā baab nikālegā

ḳhuun se lat-pat laash pe baiThā basta khole baiThā huuñ

haa.e kyā tūfān chhupā phirtā thā merī nas nas meñ

ek kalā.ī kaaT ke bahtā dariyā khole baiThā huuñ

ummidon ko aag lagae rasta khole baiTha hun

mera 'ishq use pinjra tha pinjra khole baiTha hun

chahe mujh ko sha'ir bolo chahe mujh ko diwana

hath mein kuchh ghazlon ko thame matha khole baiTha hun

wo ab jaane kis ki KHatir zulfen khole phirti hai

main ab jaane kis ki KHatir sina khole baiTha hun

dil koi kashkol hai thoDi jo KHairaat se bhar jae

kul iman sameTe aao ka'ba khole baiTha hun

kaun KHuda tariKH se laD kar KHauf ka bab nikalega

KHun se lat-pat lash pe baiTha basta khole baiTha hun

hae kya tufan chhupa phirta tha meri nas nas mein

ek kalai kaT ke bahta dariya khole baiTha hun