umr bhar ke liye ek yaad suhani de ja

'umr bhar ke liye ik yaad suhānī de jā

kuchh to ai dost mohabbat kī nishānī de jā

tū ne ḳhushbū se bhare ḳhat to bahut se bheje

ek do bol kabhī aa ke zabānī de jā

kab se baiThe haiñ tire dar pe ramā.e dhūnī

kuchh to ḳhairāt hameñ ruup kī raanī de jā

ham ne dekhe haiñ bahut saḳht bhī mausam lekin

apnī shāmoñ se koī shaam suhānī de jā

der se raah tirī dekh rahā hai 'sāgar'

tishna-lab baiThā hai do ghūñT to paanī de jā

'umr bhar ke liye ek yaad suhani de ja

kuchh to ai dost mohabbat ki nishani de ja

tu ne KHushbu se bhare KHat to bahut se bheje

ek do bol kabhi aa ke zabani de ja

kab se baiThe hain tere dar pe ramae dhuni

kuchh to KHairaat hamein rup ki rani de ja

hum ne dekhe hain bahut saKHt bhi mausam lekin

apni shamon se koi sham suhani de ja

der se rah teri dekh raha hai 'sagar'

tishna-lab baiTha hai do ghunT to pani de ja