umr bhar main to amanat mein KHayanat na karun

'umr bhar maiñ to amānat meñ ḳhayānat na karūñ

sabr aur shukr karūñ terī shikāyat na karūñ

dard mazlūm kā siine meñ basā luuñ apne

bhuul kar bhī kabhī zālim kī himāyat na karūñ

terī marzī meñ hī shāmil rahe marzī merī

kaam koī bhī binā terī ijāzat na karūñ

zaḳhm khā kar bhī du'ā denā hai fitrat apnī

dushmanoñ se bhī kabhī maiñ to 'adāvat na karūñ

ye mire sabr kī hai āḳhirī manzil jānāñ

zulm par zulm sahūñ aur shikāyat na karūñ

saare bachche mire ik saath raheñge ghar meñ

zinda jab tak rahūñ taqsīm virāsat na karūñ

us kī chāhat ne mujhe zinda rakhā hai 'mehrū'

mar hī jā.ūñgī agar us se mohabbat na karūñ

'umr bhar main to amanat mein KHayanat na karun

sabr aur shukr karun teri shikayat na karun

dard mazlum ka sine mein basa lun apne

bhul kar bhi kabhi zalim ki himayat na karun

teri marzi mein hi shamil rahe marzi meri

kaam koi bhi bina teri ijazat na karun

zaKHm kha kar bhi du'a dena hai fitrat apni

dushmanon se bhi kabhi main to 'adawat na karun

ye mere sabr ki hai aaKHiri manzil jaanan

zulm par zulm sahun aur shikayat na karun

sare bachche mere ek sath rahenge ghar mein

zinda jab tak rahun taqsim wirasat na karun

us ki chahat ne mujhe zinda rakha hai 'mehru'

mar hi jaungi agar us se mohabbat na karun