umr guzri in buton ke wasl ki tadbir mein

umr guzrī in butoñ ke vasl kī tadbīr meñ

kyā ḳhabar mujh ko ye patthar the mirī taqdīr meñ

paak kar ke is ko lā qātil lahū khātā hai josh

ġhair ke ḳhuuñ ke haiñ dhabbe dāman-e-shamshīr meñ

balkī letā hai muqaddar mujh se kyoñ har martaba

bal hai un kī zulf kā kyā gesū-e-taqdīr meñ

hijr-e-zulf-e-yār meñ is darja huuñ zār-o-nahīf

hai farāġhat se guzar ab ḳhāna-e-zanjīr meñ

aaj tak ḳhārish nahīñ zaḳhm-e-jigar kī kam huī

kis qayāmat kā mazā thā nāḳhun-e-shamshīr meñ

kis tarah be-qatl ke aa.e mujhe ārām-o-chain

shakl maqsad kī to hai ā.īna-e-shamshīr meñ

qalb meñ paivast paikāñ bhī isī sūrat se ho

jaise baiThī hai sirī ai turk tere tiir meñ

jin ke dil faulād haiñ ġham kā asar un pe ho kyā

ashk kab dekhe kisī ne dīda-e-zanjīr meñ

is za.īfī meñ ḳhatā kartā nahīñ tīr-e-sitam

haiñ abhī kas-bal javānoñ ke se charḳh-e-pīr meñ

vāqa.ī dil kī ḳhatā hai āshiq-e-mizhgāñ huā

is ko kuchh tambīh kar diije zabān-e-tīr meñ

mehr-o-ulfat kā mahal us but ke rahne kā maqām

manzil-e-dil bhī hai kyā manzil mirī ta.amīr meñ

ashk-e-ḳhūñ nāshādī-e-ushshāq par roī hai ye

ḳhuun ke dhabbe nahīñ haiñ yaar kī shamshīr meñ

kisht-e-vahshat par agar barsā.e vo āb-e-karam

kopaleñ phūTeñ abhī har dāna-e-zanjīr meñ

ek din ke dard-e-furqat ne ye naqsha kar diyā

ho ga.ī begānagī mujh meñ mirī tasvīr meñ

dekhiye qismat kī ḳhūbī kuchh paḌhā jaatā nahīñ

us ne naama bhī jo likkhā to ḳhat-e-taqdīr meñ

aarzū hai 'bazm' kī ḳhāliq vo din laa.e kahīñ

marsiya jā kar paḌhūñ maiñ rauza-e-shabbīr meñ

umr guzri in buton ke wasl ki tadbir mein

kya KHabar mujh ko ye patthar the meri taqdir mein

pak kar ke is ko la qatil lahu khata hai josh

ghair ke KHun ke hain dhabbe daman-e-shamshir mein

balki leta hai muqaddar mujh se kyon har martaba

bal hai un ki zulf ka kya gesu-e-taqdir mein

hijr-e-zulf-e-yar mein is darja hun zar-o-nahif

hai faraghat se guzar ab KHana-e-zanjir mein

aaj tak KHarish nahin zaKHm-e-jigar ki kam hui

kis qayamat ka maza tha naKHun-e-shamshir mein

kis tarah be-qatl ke aae mujhe aaram-o-chain

shakl maqsad ki to hai aaina-e-shamshir mein

qalb mein paiwast paikan bhi isi surat se ho

jaise baiThi hai siri ai turk tere tir mein

jin ke dil faulad hain gham ka asar un pe ho kya

ashk kab dekhe kisi ne dida-e-zanjir mein

is zaifi mein KHata karta nahin tir-e-sitam

hain abhi kas-bal jawanon ke se charKH-e-pir mein

waqai dil ki KHata hai aashiq-e-mizhgan hua

is ko kuchh tambih kar dije zaban-e-tir mein

mehr-o-ulfat ka mahal us but ke rahne ka maqam

manzil-e-dil bhi hai kya manzil meri tamir mein

ashk-e-KHun nashadi-e-ushshaq par roi hai ye

KHun ke dhabbe nahin hain yar ki shamshir mein

kisht-e-wahshat par agar barsae wo aab-e-karam

kopalen phuTen abhi har dana-e-zanjir mein

ek din ke dard-e-furqat ne ye naqsha kar diya

ho gai beganagi mujh mein meri taswir mein

dekhiye qismat ki KHubi kuchh paDha jata nahin

us ne nama bhi jo likkha to KHat-e-taqdir mein

aarzu hai 'bazm' ki KHaliq wo din lae kahin

marsiya ja kar paDhun main rauza-e-shabbir mein