un aankhon mein aks kabhi tu apna dekh na paega

un āñkhoñ meñ 'aks kabhī tū apnā dekh na pā.egā

is hasrat meñ ai dil ik din patthar kā ho jā.egā

shahzādoñ kī prem-kahānī afsāna ban jaatī hai

terī merī bāteñ paglī kaun yahāñ dohrā.egā

apnī mahfil jamtī hai ab shahr ke coffē house meñ

gaaoñ kī chaupāl pe aa kar kaun alaav lagā.egā

'ishq nagar meñ rahne ke ādāb zarūrī hote haiñ

pahle tum ko ḳhāmoshī kā raag sunāyā jā.egā

itnā bhī bekār na samjho yād-e-māzī ko 'nādir'

ye tinkā hī ek na ik din dariyā paar karā.egā

un aankhon mein 'aks kabhi tu apna dekh na paega

is hasrat mein ai dil ek din patthar ka ho jaega

shahzadon ki prem-kahani afsana ban jati hai

teri meri baaten pagli kaun yahan dohraega

apni mahfil jamti hai ab shahr ke coffee house mein

gaon ki chaupal pe aa kar kaun alaw lagaega

'ishq nagar mein rahne ke aadab zaruri hote hain

pahle tum ko KHamoshi ka rag sunaya jaega

itna bhi bekar na samjho yaad-e-mazi ko 'nadir'

ye tinka hi ek na ek din dariya par karaega