unki baaton ko kuchh qiyam nahin

un kī bātoñ ko kuchh qiyām nahīñ

sub.h kahte haiñ haañ to shaam nahīñ

zikr-e-dushman pe kyoñ bigaḌte ho

mehrbāñ aap kā to naam nahīñ

mujh ko kambaḳht kyoñ kaho har dam

merī jaañ ye to merā naam nahīñ

barhaman ham hue musalmāñ se

ab bhī kāfir tū hogā raam nahīñ

dar pe hai pāsbān mere liye

ġhair jaa.e to rok thaam nahīñ

ġhair par ḳhum ke ḳhum luñDhāte ho

mere hisse kā koī jaam nahīñ

mast ho kar vo shaiḳh kā kahnā

muft kī ho to mai harām nahīñ

jab kahā tum adū pe marte ho

bole is meñ koī kalām nahīñ

ġhair kyoñ jā rahe haiñ maqtal ko

imtihāñ merā qatl-e-ām nahīñ

bas tumhārā ġhulām ho ke rahūñ

chāhiye mujh ko aur naam nahīñ

mast rakhtī hai chashm-e-mast us kī

mujh ko ab ārzū-e-jām nahīñ

hañs paḌe zikr-e-vasl-e-dushman par

yā'nī merā ḳhayāl-e-ḳhām nahīñ

eid kā din hai pī bhī le ik jaam

ab to zāhid mah-e-siyām nahīñ

terī ayyāriyāñ samajhtā huuñ

tujh ko aur dushmanoñ se kaam nahīñ

kam hai kab roz-e-hijr se shab-e-ġham

sub.h is kī to us kī shaam nahīñ

ġhair hī faizyāb rahtā hai

mehrbānī tumhārī aam nahīñ

ek chup sī lagī hai 'nashtar' ko

jab se vo shoḳh ham-kalām nahīñ

un ki baaton ko kuchh qiyam nahin

subh kahte hain han to sham nahin

zikr-e-dushman pe kyon bigaDte ho

mehrban aap ka to nam nahin

mujh ko kambaKHt kyon kaho har dam

meri jaan ye to mera nam nahin

barhaman hum hue musalman se

ab bhi kafir tu hoga ram nahin

dar pe hai pasban mere liye

ghair jae to rok tham nahin

ghair par KHum ke KHum lunDhate ho

mere hisse ka koi jam nahin

mast ho kar wo shaiKH ka kahna

muft ki ho to mai haram nahin

jab kaha tum adu pe marte ho

bole is mein koi kalam nahin

ghair kyon ja rahe hain maqtal ko

imtihan mera qatl-e-am nahin

bas tumhaara ghulam ho ke rahun

chahiye mujh ko aur nam nahin

mast rakhti hai chashm-e-mast us ki

mujh ko ab aarzu-e-jam nahin

hans paDe zikr-e-wasl-e-dushman par

ya'ni mera KHayal-e-KHam nahin

eid ka din hai pi bhi le ek jam

ab to zahid mah-e-siyam nahin

teri ayyariyan samajhta hun

tujh ko aur dushmanon se kaam nahin

kam hai kab roz-e-hijr se shab-e-gham

subh is ki to us ki sham nahin

ghair hi faizyab rahta hai

mehrbani tumhaari aam nahin

ek chup si lagi hai 'nashtar' ko

jab se wo shoKH ham-kalam nahin