ان پہ آتی ہی نہیں ہوش کی تہمت کوئی

ان پہ آتی ہی نہیں ہوش کی تہمت کوئی

جن کو ہوتی ہے ترے نام سے نسبت کوئی

عشق کی شکل کوئی حسن کی صورت کوئی

باعث لطف کوئی باعث حیرت کوئی

پیرہن جھوٹ کے پہناؤ مگر یاد رہے

چھپ نہیں سکتی کسی طرح صداقت کوئی

صرف دیوانے سمجھ سکتے ہیں راز ہستی

کب کھلی عقل کے ماروں پہ حقیقت کوئی

وقت اس شخص کو نابود کرے گا اک دن

جس کی نظروں میں نہیں وقت کی قیمت کوئی

میں نے سیکھا ہی نہیں ہوش میں آنا روشنؔ

عشق ہوں عشق نہیں ہوش سے نسبت کوئی