unhon ne kya na kiya aur kya nahin karte

unhoñ ne kyā na kiyā aur kyā nahīñ karte

hazār kuchh ho magar ik vafā nahīñ karte

burā huuñ maiñ jo kisī kī burā.iyoñ meñ nahīñ

bhale ho tum jo kisī kā bhalā nahīñ karte

vo ā.eñge mirī taqrīb-e-marg meñ tauba

kabhī jo rasm-e-ayādat adā nahīñ karte

jahāñ ga.e yahī dekhā ki log marte haiñ

yahī sunā ki vo va.ada vafā nahīñ karte

kisī ke kam haiñ kisī ke bahut magar zāhid

gunāh karne ko kyā pārsā nahīñ karte

jo in hasīnoñ pe marte haiñ jīte-jī 'muztar'

vo intizār-e-payām-e-qazā nahīñ karte

unhon ne kya na kiya aur kya nahin karte

hazar kuchh ho magar ek wafa nahin karte

bura hun main jo kisi ki buraiyon mein nahin

bhale ho tum jo kisi ka bhala nahin karte

wo aaenge meri taqrib-e-marg mein tauba

kabhi jo rasm-e-ayaadat ada nahin karte

jahan gae yahi dekha ki log marte hain

yahi suna ki wo wada wafa nahin karte

kisi ke kam hain kisi ke bahut magar zahid

gunah karne ko kya parsa nahin karte

jo in hasinon pe marte hain jite-ji 'muztar'

wo intizar-e-payam-e-qaza nahin karte