uqab dil ho to sara jahan ek sa hai

uqaab dil ho to saarā jahān ek sā hai

zamīn koī bhī ho āsmān ek sā hai

koī Thikāna vatan kā badal nahīñ hotā

muhājiroñ ke liye har makān ek sā hai

ta.ayyunāt-e-ilāqa briādrī firqe

sipāh-e-jahl kahīñ ho nishān ek sā hai

vo koī sāhab-e-jāgīr ho ki mullā ho

magar hamāre liye qahrmān ek sā hai

nigāh masnad-e-a.alā pe roz-e-avval se

dayār-e-yār kā har pāsbān ek sā hai

panāh dāman-e-qānūn meñ na masjid meñ

hamāre shahr meñ har sā.ebān ek sā hai

hamārī aañkh kā taarā vo ho nahīñ saktā

tamām bazm pe jo mehrbān ek sā hai

falūja-o-najaf-o-karbalā se pahle vo

samajh rahe the ki har be-zabān ek sā hai

hazār baar bhī luT kar sabaq nahīñ sīkhā

vafā ke shahr meñ har ḳhush-gumān ek sā hai

jihād-e-saif ho 'ḳhālid' ki ho jihād-e-qalam

kisī zabān meñ ho imtihān ek sā hai

uqab dil ho to sara jahan ek sa hai

zamin koi bhi ho aasman ek sa hai

koi Thikana watan ka badal nahin hota

muhajiron ke liye har makan ek sa hai

tayyunat-e-ilaqa briadri firqe

sipah-e-jahl kahin ho nishan ek sa hai

wo koi sahab-e-jagir ho ki mulla ho

magar hamare liye qahrman ek sa hai

nigah masnad-e-ala pe roz-e-awwal se

dayar-e-yar ka har pasban ek sa hai

panah daman-e-qanun mein na masjid mein

hamare shahr mein har saeban ek sa hai

hamari aankh ka tara wo ho nahin sakta

tamam bazm pe jo mehrban ek sa hai

faluja-o-najaf-o-karbala se pahle wo

samajh rahe the ki har be-zaban ek sa hai

hazar bar bhi luT kar sabaq nahin sikha

wafa ke shahr mein har KHush-guman ek sa hai

jihad-e-saif ho 'KHalid' ki ho jihad-e-qalam

kisi zaban mein ho imtihan ek sa hai