us chashm-e-fusun-gar ke paimane ki baaten hon

us chashm-e-fusūñ-gar ke paimāne kī bāteñ hoñ

maiḳhāne meñ baiThe haiñ maiḳhāne kī bāteñ hoñ

zulf-o-lab-o-āriz kī jannat meñ pahuñch jaa.eñ

us husn-e-mujassam ke kāshāne kī bāteñ hoñ

lauTī hai sabā hal kar us jān-e-bahārāñ se

armānoñ kī kaliyoñ ke khil jaane kī bāteñ hoñ

phir dukhne lage shāne bār-e-ġham-e-hastī se

phir shāne pe zulfoñ ke lahrāne kī bāteñ hoñ

phir vaqt ke siine kī dhaḌkan na sunā.ī de

phir jaam ke shīshe se Takrāne kī bāteñ hoñ

is daur-e-haqīqat meñ afsāna sahī ulfat

kuchh raat kaTe aao afsāne kī bāteñ hoñ

alfāz se khīñcheñ ham tasvīr-e-lab-e-shīrīñ

zahr-e-ġham duniyā ko pī jaane kī bāteñ hoñ

us chashm-e-fusun-gar ke paimane ki baaten hon

maiKHane mein baiThe hain maiKHane ki baaten hon

zulf-o-lab-o-ariz ki jannat mein pahunch jaen

us husn-e-mujassam ke kashane ki baaten hon

lauTi hai saba hal kar us jaan-e-bahaaran se

armanon ki kaliyon ke khil jaane ki baaten hon

phir dukhne lage shane bar-e-gham-e-hasti se

phir shane pe zulfon ke lahrane ki baaten hon

phir waqt ke sine ki dhaDkan na sunai de

phir jam ke shishe se Takrane ki baaten hon

is daur-e-haqiqat mein afsana sahi ulfat

kuchh raat kaTe aao afsane ki baaten hon

alfaz se khinchen hum taswir-e-lab-e-shirin

zahr-e-gham duniya ko pi jaane ki baaten hon