us jaan-e-jaan se KHatm hai jab se mukalima

us jān-e-jāñ se ḳhatm hai jab se mukālima

jaarī hai apne aap se tab se mukālima

dāñtoñ ke biich bhīñch liyā hai zabān ko

mumkin nahīñ thā shor-o-shaġhab se mukālima

ug aa.e ek aan meñ kāñTe zabān par

jab bhī kiyā hai taish-o-ġhazab se mukālima

tālāb ko bahāv ke maslak kī kyā ḳhabar

us kī nazar meñ kufr hai sab se mukālima

ham un ke tevaroñ kī samajhne lage zabāñ

mauqūf jab se ho gayā lab se mukālima

sad-shukr bāt-chīt kī ik raah to khulī

jaarī huā kisī bhī sabab se mukālima

dā'vā-e-hifz par mire dhabba tirā vujūd

dīvār kar rahī hai naqab se mukālima

ikkīsvīñ sadī to dalā.el kī hai sadī

kartī nahīñ jo nām-o-nasab se mukālima

'arshī' ham aise shaḳhs se kyā guftugū kareñ

jaarī na rakh sake jo adab se mukālima

us jaan-e-jaan se KHatm hai jab se mukalima

jari hai apne aap se tab se mukalima

danton ke bich bhinch liya hai zaban ko

mumkin nahin tha shor-o-shaghab se mukalima

ug aae ek aan mein kanTe zaban par

jab bhi kiya hai taish-o-ghazab se mukalima

talab ko bahaw ke maslak ki kya KHabar

us ki nazar mein kufr hai sab se mukalima

hum un ke tewaron ki samajhne lage zaban

mauquf jab se ho gaya lab se mukalima

sad-shukr baat-chit ki ek rah to khuli

jari hua kisi bhi sabab se mukalima

da'wa-e-hifz par mere dhabba tera wujud

diwar kar rahi hai naqab se mukalima

ikkiswin sadi to dalael ki hai sadi

karti nahin jo nam-o-nasab se mukalima

'arshi' hum aise shaKHs se kya guftugu karen

jari na rakh sake jo adab se mukalima