uske chehre pe tabassum ki ziya aaegi

us ke chehre pe tabassum kī ziyā aa.egī

vo mujhe yaad karegā to hayā aa.egī

oḌh kar jism pe yādoñ kī ridā aa.egī

jab bhī maazī ke jharokoñ se havā aa.egī

kaun mazlūm kī fariyād sunegā nā-haq

lauT kar dasht meñ ḳhud apnī sadā aa.egī

kis qadar bikhrā huā huuñ maiñ bichhaḌ ke tujh se

yaad ab kis kī mujhe tere sivā aa.egī

band kamroñ meñ kisī ko bhī ye ehsās na thā

dar khuleñge to bahut tez havā aa.egī

ġhair-mānūs fazāoñ meñ to ḳhush huuñ lekin

jaane kis moḌ pe mānūs fazā aa.egī

naam to apnā gunahgāroñ kī fihrist meñ likh

tere hisse meñ bhī rañgīn qabā aa.egī

zindagī sab se judā guzregī apnī 'anjum'

maut bhī aa.ī to vo sab se judā aa.egī

us ke chehre pe tabassum ki ziya aaegi

wo mujhe yaad karega to haya aaegi

oDh kar jism pe yaadon ki rida aaegi

jab bhi mazi ke jharokon se hawa aaegi

kaun mazlum ki fariyaad sunega na-haq

lauT kar dasht mein KHud apni sada aaegi

kis qadar bikhra hua hun main bichhaD ke tujh se

yaad ab kis ki mujhe tere siwa aaegi

band kamron mein kisi ko bhi ye ehsas na tha

dar khulenge to bahut tez hawa aaegi

ghair-manus fazaon mein to KHush hun lekin

jaane kis moD pe manus faza aaegi

nam to apna gunahgaron ki fihrist mein likh

tere hisse mein bhi rangin qaba aaegi

zindagi sab se juda guzregi apni 'anjum'

maut bhi aai to wo sab se juda aaegi