uski aankhon mein hamari shairi gum ho gai

us kī āñkhoñ meñ hamārī shā'irī gum ho ga.ī

raushnī kī aaḌ meñ sab raushnī gum ho ga.ī

vo galī jo dāstānoñ hī meñ gum hotī thī bas

chalte chalte aaj ham se vāqa'ī gum ho ga.ī

ham ki vīrānoñ ke gum-karda the lekin ek shaam

ham meñ vīrānī qarīb-o-dūr kī gum ho ga.ī

bāġh-e-dil is baar kis raftār se ḳhālī huā

phuul mere gum hue ḳhushbū tirī gum ho ga.ī

do kināre ḳhāmushī ke ek ham aur ek tum

darmiyāñ jis jis kī bhī āvāz thī gum ho ga.ī

jo bhī the naqsh-e-navā ke do amānat-dār the

dil bhī ojhal ho gayā dīvār bhī gum ho ga.ī

shaam aur ham pattiyāñ chunte rahe bekār meñ

ḳhvāb kī ḳhushbū tumhāre saath hī gum ho ga.ī

us ki aankhon mein hamari sha'iri gum ho gai

raushni ki aaD mein sab raushni gum ho gai

wo gali jo dastanon hi mein gum hoti thi bas

chalte chalte aaj hum se waqa'i gum ho gai

hum ki viranon ke gum-karda the lekin ek sham

hum mein virani qarib-o-dur ki gum ho gai

bagh-e-dil is bar kis raftar se KHali hua

phul mere gum hue KHushbu teri gum ho gai

do kinare KHamushi ke ek hum aur ek tum

darmiyan jis jis ki bhi aawaz thi gum ho gai

jo bhi the naqsh-e-nawa ke do amanat-dar the

dil bhi ojhal ho gaya diwar bhi gum ho gai

sham aur hum pattiyan chunte rahe bekar mein

KHwab ki KHushbu tumhaare sath hi gum ho gai