uski aankhon pe man tha hi nahin

us kī āñkhoñ pe maan thā hī nahīñ

ḳhvāb the ḳhvāb-dān thā hī nahīñ

maiñ ta.āqub meñ chal paḌā jis ke

dhuul thī kārvān thā hī nahīñ

do zamīñ-zād jis meñ rah sakte

is qadar āsmān thā hī nahīñ

gir paḌā huuñ to rāste ne kahā

terā mujh par to dhyān thā hī nahīñ

ek ḳhvāhish thī do diloñ ke biich

aur kuchh darmiyān thā hī nahīñ

ham ne phūloñ se ḳhuub bāteñ kiiñ

baaġh meñ bāġhbān thā hī nahīñ

us ne chāhā ki jaanā jā.ūñ maiñ

us se pahle jahān thā hī nahīñ

umr us meñ guzār dī 'mumtāz'

vo jo merā makān thā hī nahīñ

us ki aankhon pe man tha hi nahin

KHwab the KHwab-dan tha hi nahin

main taaqub mein chal paDa jis ke

dhul thi karwan tha hi nahin

do zamin-zad jis mein rah sakte

is qadar aasman tha hi nahin

gir paDa hun to raste ne kaha

tera mujh par to dhyan tha hi nahin

ek KHwahish thi do dilon ke bich

aur kuchh darmiyan tha hi nahin

hum ne phulon se KHub baaten kin

bagh mein baghban tha hi nahin

us ne chaha ki jaana jaun main

us se pahle jahan tha hi nahin

umr us mein guzar di 'mumtaz'

wo jo mera makan tha hi nahin